Familja Saliko, banore e fshatit Qinam në Bashkinë Kolonjë, ka një traditë të hershme në bletari, një pasion që është trashëguar brez pas brezi.
Para viteve ’90, parku i bletëve ishte i kufizuar për shkak të rregullave të kohës, ku një familje nuk lejohej të mbante më shumë se 10 koshere. Por pas vitit 1991, me shpërbërjen e kooperativave bujqësore, familja Saliko filloi ta zgjerojë parkun e bletëve, si në sasi, ashtu edhe në cilësi.
Sot, ata mbajnë mbi 100 koshere bletësh, me mbretëresha të racës vendase (mema kolonjarë) si dhe racave të njohura Carnica dhe Buckfast.
Bletaria zhvillohet kryesisht në fshatin Qinam, por gjatë muajve tetor – maj një pjesë e parkut zhvendoset në Tiranë për periudhën e dimrit, ndërsa qershor – shtator rikthehet në Kolonjë.
Trashëgimtar i pasionit të të parëve është Hyseni, i cili këtë dashuri për bletarinë ia ka përcjellë edhe djemve të tij, Ibrahimit dhe Fjoralbit, motrës Majlinda dhe mbesës Diliola.
Bletaria “Saliko” ka dy drejtime kryesore prodhimi:
Mjaltë cilësor
Qumësht blete, një produkt i rrallë dhe delikat, që kërkon mjeshtëri të veçantë.
Ky proces fillon rreth 15-20 majit dhe zgjat deri më 20-25 qershor. Transplantimi i larvës në qeliza për prodhimin e qumështit kërkon saktësi, përqendrim dhe qetësi absolute, një proces që jo çdokush mund ta kryejë.
Në “Bletaria Saliko” do të gjeni produkte të pastra, të ruajtura në kushte sterile dhe me cilësi të garantuar, të nxjerra me pasion, durim dhe dashuri për natyrën dhe trashëgiminë.
