Qeveria ka miratuar dhënien me qira të një sipërfaqeje prej 10,000 m² në qytetin e Korçës, për vetëm 1 euro, si mbështetje për një investim të shpallur strategjik nga kompania “Investment and Development Albania” sh.p.k.
Vendimi i miratuar nga Këshilli i Ministrave dhe i botuar në Fletoren Zyrtare përfshin transferimin e pronës shtetërore në përdorim të kompanisë për realizimin e projektit “Green House Korça Resort”.
Sipas dokumentacionit të paraqitur në vendim, prona ndodhet në zonën kadastrale nr. 8561, me numër pasurie 1/911, në pronësi shtet, dhe është pjesë e fondit të pasurive të paluajtshme për mbështetjen e investimeve strategjike.
Kontrata është lidhur me tarifën simbolike prej 1 euro për 20 vite, sipas praktikës që parashikon ligji “Për Investimet Strategjike, me qëllim tërheqjen e investimeve të mëdha në turizëm, infrastrukturë dhe sektorë të tjerë prioritarë.
Projekti i quajtur “Green House Korça Resort” është miratuar më herët si “investim strategjik, procedurë e asistuar”, nëpërmjet vendimit nr. 29/4, datë 1.2.2023. Për zhvillimin dhe realizimin e projektit investues strategjik “Green House Korça Resort” do të investohet në vlerën 18,106,741 (me TVSH dhe do të përfundojë brenda 30 muajve nga data e marrjes në dorëzim të objektit dhe nxjerrjeve të lejeve përkatëse për punimet. Sipas plan biznesit të paraqitur, ndërtimi i një hoteli luksoz me 5 yje, i cili do të jetë me 5 kate dhe do të ketë në total 94 dhoma. Investimi parashikohet të investohet në 3 faza.
Qiramarrësi, sipas parashikimit për punësimin të shprehur në plan biznesin e paraqitur do të punësojë minimalisht 94 punonjës me përfundimin e investimit ku në fazën e parë parashikohen të punësohen 23 punonjës, në fazën e dytë 22 punonjës dhe në fazën e tretë 48 punonjës. Pavarësisht parashikimeve të realizimit si më sipër, monitorimi dhe përllogaritjet e afateve të realizimeve të punësimit të parashikuar, transferohen në kohë gjithmonë pas datës së lejeve përkatëse të nevojshme për punime, ngritjen e aktivitetit dhe vënien në jetë të tij.
Ky është artikull ekskluziv i Revistës Monitor, që gezon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
