Studentët e Universitetit “Fan S. Noli” në Korçë kanë zhvilluar një takim për të diskutuar nëse do t’u bashkohen protestave që prej pesë ditësh vijojnë në qytet, ku marrin pjesë kryesisht nxënës të gjimnazeve, por edhe qytetarë.
Takimi zgjati rreth një orë e gjysmë, por diskutimet nuk kanë prodhuar një vendim konkret, pasi mendimet e studentëve kanë qenë të ndara.
Sipas burimeve pranë Këshillit Studentor, një pjesë e studentëve kanë kërkuar bojkotimin e procesit mësimor, ndërsa të tjerë kanë propozuar t’u bashkohen protestave pas përfundimit të mësimit. Ka pasur edhe studentë që janë shprehur kundër bojkotit dhe pjesëmarrjes në protesta.
Studentët dhe anëtarët e Këshillit Studentor nuk kanë pranuar të prononcohen për mediat lidhur me diskutimet e zhvilluara.
Të njëjtat burime bëjnë me dije se Këshilli Studentor do të kontaktojë edhe studentët që nuk ishin të pranishëm në takim, për të marrë mendimet e tyre dhe më pas për të arritur në një vendim përfundimtar lidhur me qëndrimin që do të mbajnë ndaj protestave.
