Zgjedhjet e 11 Majit kanë sjellë ndryshime të rëndësishme në hartën elektorale të juglindjes së vendit, me Partinë Socialiste që ruan të njëjtën forcë parlamentare si katër vite më parë, ndërsa Partia Demokratike humbet një mandat në kushte të reja elektorale.
PS ka arritur të mbajë 6 mandate në këtë qark, po aq sa kishte në zgjedhjet parlamentare të vitit 2021, ndërsa PD ka pësuar një rënie, duke kaluar nga 4 mandate në vetëm 3, në një konfigurim ku qarku nuk ka më 11 mandate, por 10.
Përtej rezultateve, këto zgjedhje janë karakterizuar nga një valë e re emrash në të dy kampet politike. Romina Kuko dhe Genti Lakollari, përfaqësues të PS-së, do të ulen për herë të parë në Parlament, të zgjedhur nga lista e mbyllur e socialistëve. Ndërkohë, në radhët e opozitës, edhe Besa Spaho pritet të jetë një tjetër emër i ri që do të përfaqësojë qytetarët në Kuvend.
Në kampin socialist, veç Kukos dhe Lakollarit, spikasin edhe emrat e Vinjola Rrotës, Eridon Rustemit dhe Gëzim Gorës, të cilët kanë arritur të maksimizojnë votat personale duke sjellë një frymë të re në fushatën e PS-së.
Nga ana tjetër, në PD, të rinjtë Fidel Kreka dhe Kristino Koçibelli janë konsideruar surpriza të këndshme të këtyre zgjedhjeve. Të rritur në strukturat lokale të partisë, ata kanë arritur të marrin më shumë vota se politikanë me përvojë si Edmond Spaho dhe Andrea Mano, si dhe më shumë se drejtuesit lokalë të Partisë së Lirisë dhe PD-së në Pogradec.
Pavarësisht prezencës së fortë të emrave të rinj, zgjedhjet e 11 Majit kanë shënuar një tkurrje të ndjeshme të votave për të dy forcat kryesore. PS ka humbur rreth 4.000 vota në krahasim me 2021, ndërsa PD ka rënë nga 51.000 vota në vetëm 37.000.
Në këtë dinamikë, rol të rëndësishëm kanë luajtur edhe partitë e vogla, si ajo e Tom Doshit, “Shqipëria Bëhet” dhe Partia “Mundësia”, të cilat kanë ndikuar veçanërisht në tkurrjen e votave të PD-së, por në një masë më të vogël edhe të PS-së.
Zgjedhjet e fundit kanë treguar qartë nevojën për rinovim dhe rikthim të besimit te qytetarët, duke theksuar se konkurrenca e brendshme dhe përfshirja e figurave të reja mund të sjellin energji të reja në politikën shqiptare.
