Brunilda Mersini shpall fituese RAFIN COMPANY për rikonstruksionin e shkollës “Naim Frashëri”, me një ofertë prej 207.1 milionë lekësh. Dy kompanitë e tjera skualifikohen, ndërsa Bashkia Vlorë nuk vë në dispozicion dokumentacionin e kërkuar, duke iu përgjigjur gazetarit vetëm me një referim të përgjithshëm te faqja e Prokurimeve Publike.
Një investim prej 218.5 milionë lekësh pa TVSH për rikonstruksionin e shkollës artistike “Naim Frashëri” në Vlorë ngre pikëpyetje mbi mënyrën e zhvillimit të procedurës së prokurimit, vlerësimin e ofertave dhe, mbi të gjitha, transparencën e institucionit që administron paratë publike.
Bashkia Vlorë, nën drejtimin e kryetares Brunilda Mersini, ka shpallur fituese kompaninë RAFIN COMPANY sh.p.k., me një ofertë prej 207.179.212 lekësh pa TVSH.
Por ajo që bie në sy është diferenca tepër e vogël mes fondit limit dhe ofertës fituese. Për një investim me vlerë kaq të konsiderueshme, kompania fituese do ta realizojë projektin me një ofertë vetëm 5.18% më të ulët se fondi limit i vendosur nga vetë Bashkia.
Në vlerë absolute, diferenca është vetëm 11.3 milionë lekë nga një fond prej 218.5 milionë lekësh.
Tre kompani në garë, dy të skualifikuara
Sipas të dhënave të publikuara për procedurën me referencë REF-95425-08-05-2026, në garë morën pjesë tre operatorë ekonomikë: RAFIN COMPANY, APIS CONSTRUCTION dhe 2Z KONSTRUKSION.
Dy kompanitë e fundit u skualifikuan nga komisioni i vlerësimit, ndërsa fituese u shpall RAFIN COMPANY.
Për APIS CONSTRUCTION, Bashkia ka evidentuar mangësi në sigurimin e ofertës, në disa kritere të kapacitetit teknik dhe financiar, si dhe në licencën I.2.A.
Ndërsa për 2Z KONSTRUKSION janë evidentuar mangësi në sigurimin e ofertës, kriteret teknike dhe financiare, si dhe në katalogët e produkteve.
Por sa kanë qenë ofertat ekonomike të dy kompanive të skualifikuara? A ka pasur ndonjë ofertë më të ulët se ajo e kompanisë fituese? A janë vlerësuar me të njëjtin standard të gjithë operatorët?
Këto janë disa nga pyetjet që mbeten pa përgjigje, pasi dokumentacioni i plotë i vlerësimit nuk është vënë në dispozicion.
Kërkesa për informacion dhe përgjigjja që shmang transparencën
Për të sqaruar mënyrën se si është zhvilluar kjo procedurë, iu drejtua Bashkisë Vlorë një kërkesë e detajuar për informacion, në bazë të ligjit nr. 119/2014 “Për të drejtën e informimit”.
Kërkesa përfshinte dosjen e plotë të tenderit, ofertën ekonomike të kompanisë fituese, preventivin me çmimet për çdo zë punimi, dokumentacionin financiar, personelin teknik, makineritë, arsyet e skualifikimit të dy operatorëve të tjerë, projektin e shkollës, marrëveshjen kuadër, kontratën dhe dokumentacionin e pagesave.
Por përgjigjja e Bashkisë ishte larg asaj që kërkohej.
Koordinatorja për të Drejtën e Informimit, Orlinda Sinanaj, u përgjigj se dokumentacioni është publik dhe mund të aksesohet në faqen e Agjencisë së Prokurimit Publik. Ndërsa për dokumentet e paraqitura nga kompanitë pjesëmarrëse, Bashkia iu referua mundësisë që ato të përmbajnë të dhëna konfidenciale.
Në asnjë pikë të përgjigjes nuk u vu në dispozicion dokumentacioni konkret i kërkuar dhe as nuk u identifikuan dokumentet që mund të jepeshin me redaktimin e të dhënave të mbrojtura.
Pra, për një investim prej mbi 2 milionë eurosh, qytetarët nuk marrin përgjigje se si u analizua oferta fituese, cilat ishin çmimet për çdo punim, çfarë kapacitetesh disponon kompania dhe si u arsyetua skualifikimi i dy operatorëve të tjerë.
RAFIN COMPANY dhe kontratat publike
Të dhënat e publikuara në Open Procurement Albania tregojnë se RAFIN COMPANY ka fituar 50 procedura prokurimi, me një fond limit të përgjithshëm prej rreth 1.4 miliardë lekësh dhe vlerë ofertash fituese rreth 1.3 miliardë lekë.
Kjo e bën edhe më të rëndësishme transparencën mbi kapacitetet reale të kompanisë, kontratat që kishte në zbatim në momentin e shpalljes fituese dhe mundësinë për të përballuar një investim të kësaj madhësie.
Këto të dhëna nuk përbëjnë në vetvete provë për shkelje apo pamundësi për realizimin e punimeve, por janë arsye shtesë për të kërkuar transparencë mbi kapacitetet dhe angazhimet e operatorit fitues.
Një tjetër element që kërkon sqarim është fakti se për mbikëqyrjen e punimeve është publikuar edhe një procedurë e veçantë, me fond limit 2.688.518 lekë pa TVSH dhe kohëzgjatje 12 muaj.
Pyetjet që Bashkia Vlorë duhet të sqarojë
Për një investim që financohet me para publike, përgjegjësia e institucionit nuk përfundon me publikimin e emrit të fituesit në një platformë elektronike.
Bashkia Vlorë dhe kryetarja Brunilda Mersini duhet të bëjnë transparente:
– Sa kanë qenë ofertat ekonomike të dy kompanive të skualifikuara?
– A ka pasur ofertë më të ulët se ajo e RAFIN COMPANY?
– Përse është konsideruar e pranueshme një ofertë që është 94.82% e fondit limit?
– Kush ka hartuar projektin dhe preventivin prej 218.5 milionë lekësh?
– Cilat janë çmimet për çdo zë punimi dhe si janë përllogaritur?
– A disponon kompania personelin, makineritë dhe kapacitetet e nevojshme?
– Sa kontrata të tjera publike kishte në proces zbatimi?
– A është nënshkruar marrëveshja kuadër dhe kur do të nisë realisht investimi?
Rikonstruksioni i një shkolle artistike është një investim i rëndësishëm për qytetin, por rëndësia e tij nuk mund të përdoret si arsye për të shmangur pyetjet.
Kur bëhet fjalë për 218.5 milionë lekë para publike, transparenca nuk është zgjedhje e Bashkisë, por detyrim ndaj qytetarëve.
