Detaje të reja kanë dalë nga hetimet për atentatin e dështuar të 30 qershorit në Pogradec, ku mbeti i plagosur rëndë 35-vjeçari Brian Syzo. Policia e Korçës ka arrestuar dy persona të lidhur me këtë ngjarje, mes tyre Edison Agollin, vëllain e autorit të dyshuar të atentatit, si dhe vetë Brian Syzon.
22-vjeçari Edison Agolli ishte shpallur në kërkim që prej ditës së ngjarjes. Sipas hetimeve, ai dyshohet se ka bashkëpunuar me vëllain e tij dhe dy persona të tjerë në organizimin e atentatit ndaj Brian Syzos. Ndaj tij rëndon akuza e “vrasjes me paramendim të mbetur në tentativë, e kryer për interes ose hakmarrje dhe në bashkëpunim”.
Burime pranë grupit hetimor bëjnë me dije se gjatë hetimeve është zbuluar se Agolli dyshohet të ketë instaluar një kamerë sigurie pranë Institucionit të Ekzekutimit të Vendimeve Penale në Drenovë, me qëllim monitorimin e lëvizjeve të Brian Syzos dhe mbledhjen e informacioneve mbi aktivitetin e tij, element që konsiderohet i rëndësishëm për dokumentimin e ngjarjes.
Ndërkohë, në pranga ka përfunduar edhe Brian Syzo, por për një çështje tjetër penale. Arrestimi i tij u krye pas vendimit të Gjykatës së Apelit, e cila la në fuqi dënimin e dhënë nga Gjykata e Pogradecit në vitin 2023.
35-vjeçari është dënuar me 3 vite e 4 muaj burg për veprën penale “Prodhimi dhe shitja e lëndëve narkotike”, dënim që tashmë do ta vuajë në institucionin e ekzekutimit të vendimeve penale.
