Operacioni i madh policor në Lazarat, i zhvilluar në qershor të vitit 2014, solli arrestimin e dhjetëra banorëve dhe një ndërhyrje të paprecedentë të forcave të policisë në fshat. Por, vite më pas, mbetet një pikëpyetje që vazhdon të ngrejë diskutim: ku përfunduan bosët e vërtetë të trafikut të drogës?
Në Lazarat u arrestuan njerëz të përfshirë në kultivimin, përpunimin dhe mbajtjen e lëndëve narkotike, por a u arrit të goditej zinxhiri i plotë kriminal që kishte organizuar dhe drejtuar këtë aktivitet?
Kush i financonte tonelatat e kanabisit? Kush i siguronte tregjet jashtë Shqipërisë? Kush ishin blerësit dhe trafikantët që transportonin drogën drejt vendeve të Bashkimit Europian? Dhe mbi të gjitha, ku përfunduan fitimet e këtij aktiviteti që për vite me radhë kishte lulëzuar në Lazarat?
Në dhjetor të vitit 2018, një retrospektivë e publikuar nga Top Channel ngrinte pikërisht këtë shqetësim, duke raportuar se mbi 200 banorë të fshatit ishin arrestuar, ndërsa nuk ishte identifikuar asnjë bos i madh droge apo rrjet kriminal ndërkombëtar.
Operacioni arriti të shkatërronte një nga qendrat më të mëdha të kultivimit të kanabisit në vend, por pyetja mbetet nëse u goditën vetëm hallkat e dukshme të aktivitetit kriminal, ndërsa organizatorët dhe përfituesit e vërtetë arritën t’i shpëtonin drejtësisë.
Lazarati u vu nën kontrollin e policisë, por a u zbulua ndonjëherë e gjithë skema e trafikut që e kishte kthyer fshatin në një qendër të njohur të prodhimit dhe shpërndarjes së drogës?
