Përballimi i situatave të emergjencave civile dhe lëvrimi i fondeve në kohën dhe masën e duhur mbeten ndër shqetësimet kryesore të bashkive.
Kjo çështje është ngritur nga kryetari i Bashkisë Pogradec, Ilir Xhakolli, gjatë takimit të komisionit parlamentar, të drejtuar nga Fatmir Xhafa, i cili ka nisur një seri takimesh me bashkitë e vendit.
Sipas Xhakollit, në Bashkinë Pogradec ka raste kur fondet për emergjencat alokohen, por procedurat ligjore nuk mundësojnë përdorimin e tyre në kohë për ndërhyrje në zonat e dëmtuara.
Kritika nga pushteti vendor janë ngritur edhe për masën e fondeve të parashikuara për emergjencat civile, si dhe për mënyrën e ndarjes së tyre, e cila sipas përfaqësuesve të bashkisë, nuk i përgjigjet gjithmonë nevojave të qytetarëve të dëmtuar.
Takimi në Pogradec është pjesë e turit të komisionit parlamentar, i cili sipas Fatmir Xhafës ka në fokus tre çështje kryesore: menaxhimin e emergjencave civile, sigurinë në shkolla dhe sigurinë ushqimore.
Gjatë vizitës në Pogradec, anëtarët e komisionit kanë zhvilluar gjithashtu inspektime në doganën e Qafë Thanës, lidhur me importin e mallrave, si dhe kanë vizituar disa shkolla të qytetit.
Në shkolla janë mbledhur kërkesat dhe shqetësimet e prindërve e mësuesve, ndërsa një tjetër fokus ka qenë monitorimi i ambienteve shkollore dhe përdorimi i kamerave të sigurisë.
