Në Maliq është zhvilluar Panairi i Ëmbëlsirave, Prodhimeve Bujqësore, Blegtorale dhe Bletërritësve, një aktivitet që synon të promovojë traditat, produktet lokale dhe punën e banorëve të zonës.
Në panair u prezantuan gatime tradicionale, ëmbëlsira, produkte bujqësore e blegtorale, si dhe prodhime të bletërritësve nga zona e Maliqit.
Bletërritësit shprehen se këtë vit prodhimi i mjaltit ka qenë më i ulët, për shkak të temperaturave të ftohta gjatë natës, të cilat nuk kanë favorizuar prodhimin e nektarit. Sipas tyre, prodhimi ka qenë rreth 5-6 kilogramë mjaltë për koshere.
Një pjesë e veçantë e panairit ishin gatimet tradicionale të përgatitura nga amvisat e zonës. Bakllava, kek me sherbet, trileçe, petulla, biskota dhe gatime të tjera u ekspozuan në panair, ndërsa amvisat thanë se tradita e gatimit po përcillet edhe tek brezi i ri.
Drejtoresha e Qendrës Kulturore “Dhimitër Orgocka”, Dhora Dajko, tha se aktiviteti organizohet prej disa vitesh dhe ka për qëllim të sjellë në vëmendje punën e fermerëve dhe traditat e zonës.
Panairi, ku morën pjesë përfaqësues nga njësitë administrative të Bashkisë Maliq, synon të shndërrohet në një aktivitet të përvitshëm, duke krijuar një hapësirë për fermerët, blegtorët, bletërritësit dhe amvisat për të promovuar produktet lokale dhe për të përcjellë traditat tek brezat e rinj.
