Mbi 1000 garues u bënë pjesë e maratonës së zhvilluar këtë të diel në Korçë, në një aktivitet që solli në qytetin juglindor sportistë të moshave dhe vendeve të ndryshme.
Gara u zhvillua në tre distanca, 3, 5 dhe 21 kilometra, duke bashkuar konkurrencën sportive me sfidën personale të pjesëmarrësve.
Në garën e 3 kilometrave, vendin e parë e mori Bruno Puqja, ndërsa në distancën 5 kilometra triumfoi Lis Binaku, i cili kishte ardhur nga Gjakova për të marrë pjesë në aktivitet.
Në 21 kilometra, fitorja shkoi për atletin korçar Ilir Këllezi. Për të, triumfi në qytetin e lindjes kishte një emocion të veçantë. Këllezi tha se gjatë garës u përball edhe me konkurrentë nga Turqia dhe Greqia, ndërsa me këtë fitore ka arritur në 75 kupa dhe 203 medalje.
Maratona solli një atmosferë të veçantë sportive në Korçë, duke e kthyer qytetin në një arenë të vrapimit dhe konkurrencës. Organizatorët synojnë që aktiviteti të vijojë edhe në edicionet e ardhshme dhe të kthehet në një traditë sportive për qytetin.
