Tregu i shumicës në Korçë nis të gjallërohet që në orët e para të mëngjesit, por për shumë pensionistë dhe familje me të ardhura të ulëta, blerjet e përditshme po bëhen gjithnjë e më të vështira.
Pensionistët që frekuentojnë tregun shprehen se pensionet nuk mjaftojnë për të përballuar çmimet e ushqimeve, frutave dhe perimeve.
Një pensioniste, e cila jeton në Greqi dhe ndodhet në Korçë për pushime, thotë se ka konstatuar një diferencë të madhe të çmimeve mes dy vendeve.
“Shumë të shtrenjta. Unë jetoj në Greqi. Në krahasim me Greqinë janë shumë të shtrenjta dhe me rrogën që marrin, janë shumë të shtrenjta. Bleva se jam e detyruar, se më duhen. Pa ngrënë do rri?”
Një tjetër pensionist shprehet se me të ardhurat mujore arrin të blejë vetëm produktet më të lira.
“Ku i blejmë me këto pensione të pakta që janë? Ku i arrijmë dot? Vijmë marrim ndonjë gjë, ndonjë domate të lirë. Ku i përballojnë dot?”
Edhe tregtarët konfirmojnë rënien e fuqisë blerëse. Sipas tyre, kostot e larta të prodhimit, çmimet e farave dhe plehrave kimike, si dhe mungesa e mbështetjes për fermerët, kanë ndikuar drejtpërdrejt në treg.
“Tregu sot, ta krahasosh me 5 vite më parë, është zero. Nuk ka popullatë, nuk ka shitje. Farat janë të shtrenjta, plehrat kimike janë shumë të shtrenjta. Njerëzit nuk kanë lekë dhe kanë të drejtë.”
Në tregun e Korçës, shqetësimi duket i dyfishtë: pensionistët thonë se nuk përballojnë dot çmimet, ndërsa tregtarët përballen me rënien e blerjeve. Një situatë që tregon vështirësinë në rritje për familjet me të ardhura të ulëta për të përballuar shportën e përditshme.
