Në Dardhë, turizmi i aventurës duket se ka nisur me… një tabelë.
Prej rreth katër muajsh, në këtë pikë që duhej të shndërrohej në një prej atraksioneve të reja turistike të zonës, ajo që shihet është tabela e projektit, disa struktura metalike dhe një kantier i ngritur përgjysmë. Zipline-i, ndërkohë, ende nuk duket.
Projekti është pjesë e një kontrate me vlerë 3 milionë e 368 mijë euro, që përfshin ndërhyrje në Dardhë, Arrëz, Sinicë dhe Nikolicë. Për vetëm komponentin “Dardha Zipline” janë parashikuar 459 mijë e 990 euro pa TVSH.
Në tabelë shkruhet se afati për këtë pjesë është 360 ditë, ndërsa për kontratën në tërësi 520 ditë.
Por premtimi për zipline-in nuk është i sotëm.
Që në maj 2024, Bashkia Korçë e prezantonte ndërtimin e ZIP LINE si një nga projektet që do të pasuronte turizmin e aventurës në Dardhë dhe fshatrat përreth.
Kanë kaluar muaj, kontrata ka një afat të përcaktuar, paratë janë vendosur dhe kompania zbatuese është përcaktuar.
Në terren, megjithatë, projekti duket ende si një kantier që sapo ka nisur.
Dardha nuk ka nevojë për tabela që premtojnë turizëm. Ka nevojë për investime që përfundojnë.
Sepse me 459 mijë euro për zipline-in, qytetarët dhe turistët presin të shohin një atraksion turistik, jo vetëm hekurat e tij.
Dhe pyetja është e thjeshtë: *ku është zipline-i?*
