Pas konfirmimit të rastit të parë me virusin e Nilit Perëndimor në Shqipëri, Instituti i Shëndetit Publik ka nisur hetimin epidemiologjik në qarkun e Korçës.
Një ekip specialistësh të ISHP-së nga Tirana ka mbërritur në terren për hetimin entomologjik dhe depistimin në vatër, me qëllim identifikimin e mushkonjave që transmetojnë virusin dhe marrjen e masave të nevojshme për kontrollin e tyre.
Rasti i konfirmuar i përket një 72-vjeçari nga Korça, i cili ndodhet në Spitalin Rajonal të Korçës dhe po merr trajtimin mjekësor. Dyshohet se ai është pickuar nga një mushkonjë gjatë qëndrimit në një lulishte në qytet.
Specialistët po kryejnë kontrolle në zona të ndryshme të qarkut, ndërsa pritet edhe dezinfektimi dhe trajtimi i zonave ku mund të konstatohet prania e mushkonjave bartëse.
Ethet e Nilit Perëndimor transmetohen te njerëzit përmes pickimit të mushkonjave të infektuara. Në shumicën e rasteve infeksioni mund të mos shfaqë simptoma, ndërsa në raste të rënda mund të prekë sistemin nervor dhe të shkaktojë komplikacione serioze.
ISHP vijon monitorimin në terren për të përcaktuar praninë dhe përhapjen e mushkonjës bartëse dhe masat që do të ndërmerren për parandalimin e rasteve të tjera.
