Klubi i Volejbollit të Femrave Pogradec ka bërë një lëvizje të rëndësishme në prag të sezonit të ri sportiv, duke njoftuar zyrtarisht afrimin e volejbollistes me përvojë Stela Agolli, për sezonin 2025-2026.
Agolli, e cila luan në pozicionin 4, konsiderohet një ndër emrat më të qëndrueshëm të kampionatit shqiptar në vitet e fundit. Ajo vjen në radhët e pogradecareve pas një sezoni me Vllazninë e Shkodrës, ndërsa në të kaluarën ka qenë pjesë e Skënderbeut të Korçës, ku jo vetëm që ka lënë gjurmë me paraqitjet e saj, por ka qenë edhe kontribuuese në fitimin e trofeve të rëndësishëm, përfshirë titullin kampion.
Ky është një përforcim domethënës për skuadrën e Pogradecit, e cila duket e vendosur të rrisë nivelin e saj konkurrues dhe të pretendojë më shumë në sezonin e ardhshëm. Me eksperiencën dhe cilësitë e saj teknike, Stela Agolli pritet të sjellë stabilitet dhe peshë në lojën e ekipit, veçanërisht në krahun e majtë të sulmit.
Nga ana e saj, klubi ka shprehur kënaqësinë për këtë bashkëpunim të ri, duke theksuar se ky është vetëm hapi i parë në një projekt ambicioz që synon ndërtimin e një grupi solid dhe garues për kampionatin e ardhshëm.
Tifozët e Pogradecit tashmë mund të presin me entuziazëm debutimin e Agollit me fanellën e re, ndërsa merkatoja mbetet ende e hapur për lëvizje të tjera që do të forcojnë edhe më tej skuadrën.
