Në një skenë që i ngjan më shumë një telenovele se sa një procesi zgjedhor, Zeqine Çaushi ka humbur mandatin e saj të deputetes, me vetëm 10 vota diferencë! Po, e lexuat mirë: dhjetë vota, aq sa një familje e madhe që harroi të shkojë në votime.
Pas rinumërimit të të gjitha kutive në Fier, rezultoi se Zeqineja kishte 48 vota të pamerituara – vota që ndoshta kishin “gabuar adresën” – ndërsa Maldrita Bardho, në një ngjitje të beftë, arriti të rikuperojë 26 vota që i duheshin si oksigjen.
Dhe kështu, me një matematikë që edhe kalkulatori i KQZ-së mezi e përballoi, mandati i rrëshqiti Zeqinës si sapun në dush. Ajo mbeti me sy nga kutitë, ndërsa Bardho feston një fitore që s’do e besonte as horoskopi i ditës.
Ironia? Në fjalimin e fundit në Kuvend, Zeqina kishte thënë: “Askush s’mund të më heqë mandatin, përveç popullit.” Epo, populli foli… me 10 vota.
