Mbesa e denoncoi si të zhdukur dhe nuk la vend pa e kërkuar gjersa kërkoi ndihmën e policisë, por pasi kanë kaluar më shumë se dy muaj e gjysmë, dajën e saj e gjetët të vdekur dhe më gjendje të dekompozuar.
Drejtoria Vendore e Policisë Korçë tha sot se pas humbjes më 9 shkurt 2026, është gjetur trupi i pajetë i A. D., 72 vjeç, banues në Korçë, (i dekompozuar).
I ndjeri u gjet në vendin e quajtur “Çezma e Manushaqeve”, në malin Moravë, Korçë, raporton noa.al.
Më herët, më datë 09.02.2026, ishte bërë denoncim për largimin nga banesa të të moshuarit.
Në Komisariatin e Policisë Korçë, ishte paraqitur shtetasja E. S., 30 vjeçe, banuese në Korçë, e cila kishte deklaruar se i është larguar nga banesa, daja i saj, shtetasi A. D., 72 vjeç.
Atëherë policia tha se po punonte për gjetjen e tij, por kur kanë kaluar dhjetë javë, vetëm kalimtarë të rastit e kanë gjetur të humburit, të pajetë.
“Nga tërësia e veprimeve hetimore, këqyrja e vendit të ngjarjes, këqyrja e kufomës dhe deklarimet e mjekut ligjor pas autopsisë, rezulton se nuk ka patur dëmtime të jashtme dhe se 72-vjeçari dyshohet ta ketë humbur jetën për shkaqe natyrale”, tha policia.
