Kastoria: Kryetari i Bashkisë Pogradec, Ilir Xhakolli, zhvilloi një vizitë zyrtare në Bashkinë e Kastorias, ku u prit nga homologu i tij, Kryetari i Bashkisë, Giannis Korentsidis. Vizita erdhi si vazhdim i takimit që Korentsidis zhvilloi së fundmi në Pogradec dhe kishte për qëllim forcimin e marrëdhënieve ndërkufitare dhe thellimin e bashkëpunimit mes dy bashkive.
Gjatë qëndrimit, u diskutua mbi kornizën e bashkëpunimit në fushat e turizmit, sipërmarrjes, trashëgimisë kulturore, sportit dhe projekteve me financim të huaj.
Vizita rikonfirmoi vullnetin e përbashkët për zhvillimin e një bashkëpunimi të qëndrueshëm dhe vendosi bazat për nënshkrimin e një Marrëveshjeje Bashkëpunimi, e cila pritet të sjellë përfitime të shumanshme për qytetet tona.
