Filantropi i njohur bullgar Milen Vrabevski ka komentuar nga Korça diskutimet për një reformë të mundshme të hartës territoriale në Shqipëri dhe ndikimin që ajo mund të ketë mbi Bashkinë e Pustecit.
I pyetur nëse një riorganizim territorial mund të rrezikojë ekzistencën e bashkisë me shumicë minoritare, Vrabevski u shpreh se kjo është një çështje që i takon politikës shqiptare dhe institucioneve të vendit për ta vendosur.
Sipas tij, fokusi kryesor nuk është ndarja administrative, por garantimi i të drejtave të komunitetit bullgar në Shqipëri. Ai kujtoi se në vitin 2017 Parlamenti shqiptar njohu zyrtarisht minoritetin bullgar, i cili sot përbën një nga komunitetet më të mëdha minoritare në vend.
Vrabevski theksoi se angazhimi i tij lidhet me mbështetjen e komunitetit bullgar në fusha të ndryshme, duke përfshirë shëndetësinë, arsimin dhe përmirësimin e kushteve të jetesës. Ai shtoi se organizatat që përfaqëson po investojnë për zgjidhjen e problemeve të komunitetit dhe për forcimin e të drejtave të tij.
“Ne jemi këtu për të investuar te komuniteti bullgar, te të drejtat e tyre, te qendrat shëndetësore dhe arsimi. Për ne më e rëndësishme është që të drejtat e komunitetit të respektohen dhe problemet e tyre të marrin zgjidhje”, u shpreh ai.
Filantropi bullgar vlerësoi gjithashtu rrugën europiane të Shqipërisë, duke theksuar se respektimi i të drejtave të pakicave dhe standardeve europiane mbetet një element i rëndësishëm në procesin e integrimit në Bashkimin Europian.
