Një gjest prekës i një vëllai zemërthyer, Jukensi e përjetëson në lëkurë portretin e Guidos
Një muaj pas ndarjes tragjike nga jeta të fotografit të ri dhe të talentuar nga Pogradeci, Guido Dervishllari, vëllai i tij, Jukensi, ka bërë një gjest që prek thellë çdo zemër. Ai ka vendosur të gdhendë në trup përjetësisht portretin e vëllait të ndjerë, duke e kthyer në një tatuazh simbol dashurie dhe kujtimi të përjetshëm.
Ishte pikërisht Jukensi, ai që e gjeti Guidon pa jetë në ditën fatkeqe, i varur në një pemë. Një pamje që nuk do të shlyhet kurrë nga kujtesa e tij dhe që e ka tronditur thellë. Por mes dhimbjes së thellë, ai ka gjetur një mënyrë për ta mbajtur pranë, çdo ditë, çdo orë, në lëkurën e tij, si një dëshmi e lidhjes së jashtëzakonshme që kishin.
Vdekja e Guidos, vetëm 20 vjeç, tronditi jo vetëm familjen dhe rrethin miqësor, por edhe gjithë opinionin publik pogradecar e më gjerë. I njohur për talentin e tij në artin e fotografisë dhe shpirtin e ndjeshëm, Guido ishte bërë një emër i dashur mes artistëve të rinj dhe të apasionuar pas pamjes dhe ndjesisë që kap lenteja e tij.
Ky tatuazh nuk është thjesht një shenjë në trup, është një dëshmi dashurie, dhimbjeje dhe përjetësimi. Një mënyrë për të mos harruar. Për të treguar se ndonëse jeta i ndau fizikisht, asgjë nuk e thyen lidhjen e vëllazërisë së tyre.
Pogradeci mban mend Guidon me dashuri, dhe tani, falë Jukensit, ai do të jetojë përherë jo vetëm në kujtime, por edhe në mishin dhe shpirtin e atij që e deshi më shumë.
