Për këtë vit akademik, në programet që ofron Universiteti “Fan Noli” i Korçës kanë aplikuar më shumë maturantë se një vit më parë. Një gjë e tillë bëhet e ditur nga rektori, Prof. Dr. Lorenc Ekonomi, i cili thotë se kanë aplikuar rreth 3,700 maturantë, ose 7% më shumë se vitet e kaluara. Ai gjithashtu thekson se degët më të preferuara kanë qenë Infermieria dhe programi Edukim Fizik dhe Sporte, por e veçanta është kërkesa e lartë e maturantëve për programet e Fakultetit të Bujqësisë, ku janë shënuar 50% më shumë aplikime.
Prof. Dr. Lorenc Ekonomi, Rektor i Universitetit “Fan Noli” Korçë
Megjithëse është ende herët, rektori i Universitetit “Fan Noli” mendon se do të ketë më shumë studentë të regjistruar në këtë vit të ri akademik. Ai gjithashtu sqaron se, në varësi të regjistrimeve, do të shihet edhe mundësia e mosaktivizimit të programeve, në të cilat do të ketë pak ose aspak regjistrime, ndërsa për këtë vit nuk pritet të ketë mbyllje përfundimtare të programeve. Megjithatë, gjithçka do të qartësohet pas përfundimit të periudhës së regjistrimeve për vitin akademik 2025–2026 në Universitetin “Fan Noli” të Korçës.
