Pogradeci do të mirëpresë më 26 korrik edicionin e katërt të Maratonës Enkelana, një aktivitet sportiv i përmasave ndërkombëtare që sjell në qytet garues nga 38 vende të botës, profesionistë dhe amatorë.
Maratona do të zhvillohet në dy disiplina kryesore:
➡️ Gjysmë-maratonë 21.195 metra nga Lin në Pogradec
➡️ Gara 11.500 metra Pogradec–Tushemisht–Pogradec
Për mbarëvajtjen e aktivitetit, do të ketë kufizime në qarkullimin rrugor:
🔴 Nga ora 18:50 deri në 20:30 do të bllokohet aksi Lin–Pogradec, me nisje nga qendra e fshatit Lin. Sportistët do të devijojnë në kilometrin e 12-të, për të përfunduar garën në korsinë e biçikletave.
🔴 Nga ora 19:00 deri në 21:00 do të jetë e bllokuar rruga në itinerarin Pogradec–Tushemisht–Pogradec, përfshirë bulevardin “Reshit Çollaku”, bulevardin “Kajo Karafili”, rrugën pranë karburantit “Gega”, segmentin përgjatë liqenit deri tek Vilat dhe devijimin tek rruga e zjarrfikëses.
Forca të shumta sigurie do të jenë në terren për të garantuar zhvillimin normal të garës, mes tyre policia e rendit, policia rrugore, policia bashkiake, shërbimi zjarrfikës dhe ambulanca.
Organizatorët kërkojnë mirëkuptimin e qytetarëve dhe drejtuesve të automjeteve për të shmangur qarkullimin gjatë orareve të përcaktuara, në mënyrë që aktiviteti të zhvillohet në mënyrë të sigurt dhe të suksesshme.
