Për korçarët dhe turistët e shumtë që kishin zgjedhur qytetin më të madh të juglindjes së vendit për të festuar fundvitin, janë organizuar dy koncerte festive. I pari, i titulluar “Kitarat e Korçës”, dhe i dyti me interpretimin e këngëtarëve të rinj të qytetit.
Në koncertin e dytë u ngjitën në skenë disa nga talentet më të spikatura të brezit të ri të qytetit të serenatave, ndërsa koncerti “Kitarat e Korçës” bashkoi në një skenë të gjitha brezat: nga nxënës të klasave të 5-ta të Liceut Artistik, deri te instrumentistët më të moshuar, të cilët kanë një jetë të tërë duke interpretuar me kitarë këngët më të njohura të Korçës.
Të dy koncertet krijuan një atmosferë të jashtëzakonshme në pedonalen e qytetit, duke tërhequr jo vetëm vëmendjen e banorëve vendas, por edhe të turistëve të shumtë, të cilët qëndruan për më shumë se gjysmë ore për të ndjekur performancat artistike.
Edhe në ditët në vijim, Bashkia e Korçës ka planifikuar aktivitete të tjera kulturore dhe koncerte festive, të cilat do të zhvillohen në pedonalen e qytetit, në Pazarin e Vjetër, si dhe në ambientet e teatrit “Andon Zako Çajupi”.
