Një ngjarje e rëndë është regjistruar pasditen e sotme në Pogradec, ku një i moshuar ka humbur jetën në një prej plazheve në hyrje të qytetit.
Sipas informacioneve paraprake, ai dyshohet se ka pësuar një infarkt kardiak vetëm pak çaste pasi ka hyrë në ujërat e liqenit.
Menjëherë në vendngjarje mbërritën shërbimet e policisë dhe ekipi mjekësor, të cilët i dhanë ndihmën e parë dhe kryen manovrat e reanimimit në përpjekje për t’i shpëtuar jetën. Megjithatë, pavarësisht përpjekjeve të mjekëve, i moshuari nuk arriti të mbijetojë.
Ky është rasti i parë me pasojë vdekjeje i regjistruar në liqenin e Ohrit gjatë këtij sezoni veror në Pogradec.
Burime paraprake bëjnë me dije se shkaku i dyshuar i humbjes së jetës është një arrest kardiak, ndërsa ekspertiza mjeko-ligjore pritet të përcaktojë shkakun e saktë të vdekjes.
Policia ka nisur veprimet procedurale për dokumentimin e plotë të rrethanave të ngjarjes.
