Një problematikë e përsëritur raportohet në farmacinë pranë QSUT-së, pranë Qendrës së Konsultave, ku pacientët që paraqiten për të marrë injeksione apo medikamente përballen me pritje të gjata për shkak të mungesës së sistemit.
Sipas denoncimit, problemi është sistematik dhe përsëritet çdo të hënë dhe të premte, duke shkaktuar radhë të gjata dhe pritje prej disa orësh për pacientët.
Bëhet me dije se problematika është adresuar disa herë pranë zyrave të AKSHI-t, ndërsa njoftimi për defektin e sotëm është bërë që në orën 08:00 të mëngjesit. Megjithatë, deri në orën 11:30 nuk kishte ende një përgjigje apo zgjidhje për situatën.
Pacientët shprehen të shqetësuar për përsëritjen e këtij problemi, veçanërisht për faktin se bëhet fjalë për persona që paraqiten për të marrë medikamente dhe trajtime të nevojshme.
Kërkohet ndërhyrje për zgjidhjen e problematikës dhe marrja e masave që situata të tilla të mos përsëriten, duke shmangur pritjet e gjata dhe radhët për pacientët.
