Tirana është shumë pranë shpalljes kampione në volejboll për femra, pasi ka siguruar fitoren e tretë në serinë finale ndaj Pogradecit, duke triumfuar 2-3 në një përballje dramatike të luajtur në Pogradec.
Ndeshja e tretë e finaleve dhuroi emocione të forta dhe rivalitet të lartë përgjatë pesë seteve. Skuadra liqenore e nisi më mirë takimin, duke fituar setin e parë 25-19, por Tirana reagoi menjëherë dhe barazoi me fitoren 22-25 në setin e dytë. Pogradeci riktheu avantazhin pas suksesit 25-21 në setin e tretë, ndërsa kryeqytetaset treguan eksperiencën e tyre duke fituar setin e katërt 23-25. Gjithçka u vendos në setin final, ku Tirana u tregua më e saktë dhe fitoi 10-15, duke vulosur suksesin 2-3.
Pas ndeshjes, lojtarja turke e Tiranës, Sigme Korkmaz, u shpreh optimiste se skuadra e saj mund të mbyllë serinë në kryeqytet, aty ku do të luhet ndeshja e katërt.
Kapitenia Enkeleda Braho theksoi se eksperienca dhe pesha e fanellës së Tiranës, me 21 tituj kampionë në histori, mbeten një avantazh i madh në momentet vendimtare, duke nënvizuar se ky është një faktor që mund të bëjë diferencën përballë një Pogradeci që synon trofeun e parë historik.
Ndeshja e katërt do të luhet këtë mesjavë në Tiranë, aty ku Pogradeci ka treguar më parë se di të surprizojë, pasi fitoi sfidën e dytë 1-3. Megjithatë, Tirana mbetet vetëm një fitore larg mbrojtjes së titullit kampion.
