Tirana ka hedhur një hap të rëndësishëm drejt titullit kampion në volejboll për femra, duke fituar ndeshjen e parë të finaleve përballë Pogradeci me rezultatin 1-3 në transfertë.
Setet e takimit u mbyllën 22-25, 23-25, 25-21 dhe 18-25, në një përballje ku skuadra tiranase u shfaq më e organizuar në çdo element të lojës. Ajo bëri diferencën që në pritjen e topit të parë, duke ndërtuar më pas aksione të shpërndara mirë në sulm përgjatë gjithë rrjetës.
Vendimtare rezultoi edhe loja në pozicionin tre, ku Malaj ishte një pikë kyçe në fazën ofensive, duke realizuar 13 pikë.
Nga ana tjetër, Pogradeci zhgënjeu në këtë përballje të parë finale, duke mos arritur të funksionojë si grup, ndryshe nga ndeshjet e mëparshme të sezonit. “Liqenorët” shfaqën probleme në pritjen e topit të parë, në organizimin e sulmit dhe në bllok, çka ndikoi drejtpërdrejt në rezultatin përfundimtar.
Ndeshja e dytë e serisë finale do të zhvillohet të premten në Tiranë, ku Tirana synon të thellojë avantazhin, ndërsa Pogradeci do të kërkojë reagimin për të rikthyer balancat në garën për titull.
