Një festë e veçantë do të zhvillohet për herë të parë më 19 korrik 2025 në zonën e njohur si Uçkat në Pogradec. E titulluar “Te Uçkat si dikur”, kjo ngjarje synon të sjellë në vëmendje kujtimet e fëmijërisë, traditat lokale dhe jetën e dikurshme buzë liqenit, përmes një programi të pasur kulturor, artistik dhe argëtues.
Festa do të zgjasë gjatë gjithë ditës, nga ora 10:00 deri në 23:00, dhe do të përfshijë aktivitete për të gjitha moshat. Pjesë e programit do të jenë kapja tradicionale e peshkut me vazo, gara noti dhe kanoe, lojëra për fëmijë, sfida gatimi me receta tradicionale, panair vendas dhe ekspozitë dokumentare dhe artizanale.
Atmosfera do të kulmojë në mbrëmje me një koncert festiv ku do të performojnë disa nga emrat më të dashur të muzikës shqiptare. Në skenën e “Te Uçkat si dikur” do të ngjiten Kozma Dushi, Beni Zdrafko, Vëllezërit Kapa, Eni Guçi, Ersi Kazerma dhe Rogen Karafili. Po ashtu, pjesë e eventit do të jetë edhe grupi i valleve të Pogradecit, me një repertor autentik që ruan dhe promovon trashëgiminë kulturore të zonës.
“Te Uçkat si dikur” është konceptuar si një festë që promovon lidhjen me natyrën, vlerat komunitare dhe pasuritë e trashëguara brez pas brezi.
Organizatorët synojnë që kjo të jetë vetëm edicioni i parë i një tradite të re, që do të zhvillohet çdo verë, për të promovuar Pogradecin dhe liqenin si një destinacion të gjallë kulturor dhe turistik.
Festa është e hapur për të gjithë dhe pritet të mbledhë jo vetëm banorët e zonës, por edhe shumë vizitorë dhe turistë që ndodhen në Pogradec gjatë sezonit veror.
