Mungesa e stafit të kualifikuar vijon të jetë një nga sfidat kryesore të sektorit të turizmit në Shqipëri. Për të përmirësuar cilësinë e shërbimit, eksperti i trajnimit të stafit, Fatjon Selimaj, së bashku me ekipin e tij, ka nisur një seri trajnimesh falas në qytete të ndryshme të vendit, kryesisht në Pogradec dhe në zonat bregdetare.
Trajnimet përqendrohen te mikpritja, komunikimi me klientët dhe mënyra e shërbimit në bare, restorante dhe struktura akomoduese, me synimin për të rritur profesionalizmin në sektorin e turizmit.
Një tjetër çështje që po diskutohet në këtë industri është punësimi i stafit të huaj dhe ndikimi i tij në tregun vendas. Sipas Selimajt, niveli i pagës lidhet kryesisht me eksperiencën dhe kualifikimin e punonjësit, pavarësisht nëse është shqiptar apo i huaj. Megjithatë, punësimi i stafit nga jashtë shoqërohet edhe me kosto shtesë për bizneset, si akomodimi dhe ushqimi.
Për ekspertin, zgjidhja e mungesës së punonjësve nuk qëndron vetëm te rritja e pagave, por edhe te investimi i vazhdueshëm në formimin profesional të tyre gjatë gjithë vitit. Kjo do t’u mundësonte bizneseve të ruanin stafin e trajnuar dhe të shmangnin nisjen nga e para të procesit të trajnimit në çdo sezon turistik.
Selimaj e sheh ardhjen e punonjësve të huaj si një konkurrencë të re në treg, e cila mund të nxisë rritjen e standardeve dhe profesionalizmit. Sipas tij, ata që zgjedhin ta ndërtojnë karrierën në këtë industri dhe fitojnë eksperiencë ndër vite, kanë mundësi të përfitojnë paga më të mira.
Nga Pogradeci deri në zonat bregdetare, trajnimet synojnë që shërbimi në turizëm të mos konsiderohet thjesht një punë sezonale, por një profesion që kërkon përgatitje, eksperiencë dhe zhvillim të vazhdueshëm.
