Pogradeci ka mikpritur për herë të parë një garë sportive Triathlon, që përfshinte tre disiplina: not, çiklizëm dhe vrapim. Sipas organizatorit Julian Lekoçaj, qyteti i Pogradecit ofron të gjitha kushtet e nevojshme për zhvillimin e aktiviteteve të tilla sportive, ndërsa theksoi se në këtë edicion morën pjesë mbi 100 sportistë nga Shqipëria, Kosova, Mali i Zi, Britania e Madhe dhe Greqia.
Në garat e zhvilluara, sportistët nga Kosova dominuan në të dyja kategoritë, Olimpik dhe Sprint, duke siguruar vendet e para në disiplinat përkatëse.
Për pjesëmarrësit, përtej rivalitetit sportiv, aktiviteti shërbeu edhe si një promovim i stilit të shëndetshëm të jetesës dhe rëndësisë së përfshirjes së të rinjve në sport.
Triathloni është eventi i dytë sportiv me përmasa ndërkombëtare që zhvillohet në Pogradec, pas Maratonës Enkelana, e cila pritet të rikthehet në muajin korrik me pjesëmarrjen e atletëve nga më shumë se 35 vende të botës.
Organizatorët shprehen se synimi është që ky aktivitet të kthehet në një traditë të përvitshme, duke promovuar jo vetëm sportin, por edhe potencialin turistik të qytetit të Pogradecit.
