Pogradec – Kontrollet periodike në vijën liqenore të Pogradecit vijojnë edhe gjatë muajit gusht, me qëllim monitorimin e situatës dhe garantimin e mbarëvajtjes së sezonit turistik.
Institucioni i Prefektit të Qarkut Korçë, në bashkëpunim me inspektoratet dhe Bashkinë Pogradec, zhvilloi një tjetër inspektim në zonën liqenore, ku në fokus ishte siguria e pushuesve, rendi dhe qetësia publike, siguria ushqimore, cilësia e ujit, si dhe kontrolli i mjeteve ujore.
Prefektja e Qarkut Korçë, Florina Zegullaj, deklaroi se kontrollet synojnë të evidentojnë problematikat e mundshme dhe të merren masa për përmirësimin e tyre gjatë sezonit. Sipas saj, deri më tani raportimet nga institucionet tregojnë se Pogradeci po përjeton një sezon të qetë dhe të suksesshëm, pa problematika të mëdha që mund të cenonin sigurinë e pushuesve.
Gjatë inspektimit u morën informacione nga strukturat përgjegjëse për rendin dhe sigurinë, zhurmat në ambientet e shërbimit, kontrollet e Policisë Kufitare për mjetet ujore, sigurinë ushqimore, si dhe parametrat e cilësisë së ujit të liqenit.
Nga Njësia Vendore e Kujdesit Shëndetësor në Pogradec u bë me dije se parametrat e ujit kanë rezultuar brenda normave të kërkuara, ndërsa strukturat e tjera raportuan për situatën e rendit, sigurisë ujore dhe respektimin e rregullave gjatë sezonit.
Një tjetër element i monitorimit është zbatimi i kushteve të lejeve për stacionet e plazheve. Agjencia e Bregdetit kryen kontrolle periodike, çdo dy javë, për të verifikuar respektimin e kushteve dhe lejeve përkatëse.
Ndërkohë, gushti i këtij viti ka sjellë një rritje të ndjeshme të numrit të pushuesve në qytetin liqenor, me një fluks të raportuar rreth tre herë më të lartë krahasuar me periudhat e mëparshme. Për këtë arsye, institucionet vijojnë të jenë në gatishmëri të përditshme, me synim garantimin e sigurisë dhe mbarëvajtjes së sezonit turistik.
