Në juglindje të vendit është zhvilluar mbledhja e Komitetit Rajonal të Turizmit, ku u diskutuan problematikat dhe masat për mbarëvajtjen e sezonit turistik veror. Në fokus të diskutimeve ishin ndërtimet pa leje, higjiena, administrimi i hapësirave publike dhe mbrojtja nga zjarret.
Zv.ministri i Brendshëm, Xhemal Qefalia, kërkoi më shumë angazhim dhe koordinim institucional për garantimin e një sezoni turistik të sigurt dhe të organizuar.
“Duhet angazhim i gjithë sektorëve. Një merak tjetër është problemi i higjienës dhe pastërtisë. Tjetër element janë ndërtimet pa leje. Këtu duhet të ketë bashkëveprim midis policisë dhe inspektoriatit, që të mos ndodhin situata si ajo e Sarandës, ku individë të veçantë krijojnë shqetësime. Edhe mbrojtja kundër zjarrit është element shumë i rëndësishëm në prag të sezonit turistik”, u shpreh Qefalia.
Më shumë koordinim mes strukturave lokale kërkoi edhe prefektja e Qarkut Korçë, Florinda Zegullaj, veçanërisht për administrimin e plazheve publike në Pustec dhe Pogradec.
“Vëmendje e veçantë duhet t’u kushtohet stacioneve të plazhit në Pustec dhe Pogradec, si edhe administrimit të hapësirave publike. Pritet të kemi sfida të reja. Kemi dyfishuar hapësirat publike të plazheve dhe kërkohet koordinim akoma më i mirë midis policisë bashkiake dhe Agjencisë së Bregdetit”, deklaroi Zegullaj.
Nga ana tjetër, operatorët turistikë ngritën shqetësime lidhur me vonesat në dogana gjatë pikut të sezonit dhe kufizimin e muzikës live pas mesnatës. Sipas tyre, nëse këto problematika vijojnë edhe këtë verë, bizneset turistike mund të përballen me dëme ekonomike të konsiderueshme.
