Shtegu Bishnicë-Liqenet e Lukovës, destinacion në rritje për dashamirësit e natyrës
Udhëtimi drejt Liqeneve të Lukovës po kthehet në një nga aventurat më të kërkuara për turistët vendas dhe të huaj që kërkojnë të shijojnë natyrën e paprekur të Mokrës. Falë përfundimit të rrugës së re Qukës-Qafë Plloçë, destinacioni është afruar ndjeshëm me aksin nacional, duke sjellë rritje të dukshme të numrit të vizitorëve.
Vetë Bishnica mbetet një nga zonat më piktoreske të Shqipërisë, e bekuar me pyje, liqene e peizazhe që tërheqin gjithnjë e më shumë turistë. Vizitorët vijnë jo vetëm nga qytetet e vendit, por edhe nga jashtë, kryesisht gjermanë, polakë dhe çekë, të cilët preferojnë natyrën e egër dhe rrugët malore plot aventura.
Ndërkohë, Lukova konsiderohet si një nga zonat më të bukura për t’u vizituar, për shkak të bimësisë së pasur, peizazheve mahnitëse dhe liqeneve unike që ofron, duke e kthyer këtë cep të Mokrës në një destinacion gjithnjë e më tërheqës për turizmin malor dhe ekologjik.
Një tjetër veçanti që e bën Bishnicën të paharrueshme është mikpritja e banorëve, e cila ruan ende ngrohtësinë dhe shpirtin e vërtetë të zonës së Mokrës. Vizitorët priten me bujari, gatime tradicionale dhe produkte të fshatit. Ndër më të pëlqyerat janë gatimet e brumit si byreku, kulaçi, pispilia apo petaniku, që përgatiten me receta të vjetra dhe shërbehen me dashuri.
