Për të 18-in vit radhazi, në Korçë është organizuar “Rin Show”, një nga aktivitetet më të rëndësishme artistike për të rinjtë, ku gjimnazet e qytetit konkurrojnë në fusha të ndryshme si muzika, aktrimi, piktura dhe kërcimi.
Ky spektakël ka shërbyer ndër vite si një platformë për zbulimin e talenteve të reja, shumë prej të cilëve e shohin pjesëmarrjen jo vetëm si një garë mes shkollash, por si një hap drejt një të ardhmeje në art.
Një prej pjesëmarrësve, gjimnazisti Jorgo Cenolli, shprehet se pasioni për artin është shtysa kryesore:
“Me pëlqen shumë aktrimi, kërcimi, sfilatat. Kam marrë pjesë edhe në karnavale. Ka shumë talente që spikasin në fusha të ndryshme. Unë dua të ndjek rrugën e artit, në regji ose aktrim.”
Përfaqësues të institucioneve vendore theksojnë rëndësinë e mbështetjes për talentet e reja, me synimin që ato të zhvillohen dhe të kontribuojnë në qytetin e tyre. Sipas tyre, Korçë mbetet një qendër e rëndësishme e artit dhe kulturës në Shqipëri, me traditë të pasur dhe figura të shumta të njohura.
Ndërkohë, udhëheqësja artistike Blerta Belliu vlerëson ndikimin e këtij eventi në afrimin e të rinjve me artin dhe teatrin:
“Korça ka nevojë për publik të ri. Në teatër mosha mesatare është mbi 40 vjeç, ndaj ky interes i të rinjve na gëzon. Këto aktivitete i afrojnë ata me skenën dhe me shfaqjet profesionale.”
Këtë vit, çmimin e madh të “Rin Show” e fitoi Kolegji Preka, ndërsa organizatorët theksojnë se cilësia e eventit vjen çdo vit në rritje, duke evidentuar veçanërisht talente në fushën e aktrimit.
“Rin Show” mbetet një nga aktivitetet më të rëndësishme për promovimin e artit tek të rinjtë dhe një mundësi konkrete për të zbuluar brezin e ardhshëm të artistëve shqiptarë.
