30 familje në bashkinë e Korçës janë përfituese të programit të strehimit për rikonstruksionin e banesave. Bëhet fjalë për familje të varfra të cilat me të ardhurat që kanë, nuk mund ti kryejnë vetë këto punime. Kryesisht objektet ndodhen në qytetin e Korçës por ka edhe në fshatrat Mborje, Dishnicë, Drenovë, Voskop, Qatrom, Moravë e Barç. Puna tashmë ka filluar në disa prej objekteve, thotë përgjegjësja e planifikimit të territorit në bashkinë e Korçës Edona Venxha.
“Për projektin ‘përmirësimi i kushteve të banimit’ për komunitete të varfra të pafavorizuara, ne kemi 30 familja të cilat përfitojnë nga ky investim që po bën bashkia. Janë të vendosura në 20 objekte. Janë rikonstruksion të çative. Kemi ndërhyrje të brendshme gjithashtu, ku kryesisht sistemin dhe rikonstruksion të ambienteve hidorsanitare të tyre, sistemim të dyerve dhe dritareve të jashtme të tyre. Po ashtu, ka objekte që kanë përkeqësime të sistemit të tyre konsturktiv, kemi dhe suvatime të brendshme, lyerje të brendshme të të gjithë ndërtesave”, deklaroi Venxha.
Investimi shkon në 17,4 milionë lekë dhe pritet që deri në dhjetor të gjitha objektet të kenë përfunduar, duke i dhënë mundësinë familjeve përfituese të kenë kushte më të mira në banesat e tyre.
