Propozimi i përfshirë në draftligjin e Partisë Socialiste për hartën e re territoriale, që parashikon shkrirjen e Bashkisë Maliq dhe kalimin e saj si njësi administrative nën administrimin e Bashkisë Korçë, është pritur me kundërshtime nga banorët e qytetit.
Sipas draftit, mbi 30 mijë banorë të më shumë se 70 fshatrave do t’i drejtoheshin Bashkisë Korçë për të marrë shërbimet administrative. Një skenar që, sipas banorëve të Maliqit, do t’i largonte shërbimet nga qytetarët dhe do të sillte më shumë vështirësi.
Qytetarët shprehen se shërbimet publike duhet të jenë sa më afër komunitetit dhe jo të centralizohen. Ata argumentojnë se një bashkim me Korçën do të ndikonte negativisht në aksesin ndaj administratës, investimeve dhe zhvillimit të zonës.
“Nuk duhet të shkrihet. Bashkinë e kemi afër dhe kemi nevojë për të”, shprehet një banor, ndërsa të tjerë theksojnë se largimi i institucioneve do të sillte pasoja për komunitetin dhe do të zbehte vëmendjen ndaj nevojave të Maliqit.
Debati mbi reformën e re territoriale ka nisur të ngjallë reagime në disa bashki të vendit. Në Maliq, qëndrimi i qytetarëve duket i qartë: bashkia duhet të vijojë të funksionojë si njësi e pavarur, me shërbimet pranë banorëve.
