Fluks i shtuar udhëtarësh është shënuar këtë të hënë në Pikën e Kalimit Kufitar të Kapshticës, në dalje drejt Greqisë, duke sjellë krijimin e radhëve të gjata të automjeteve.
Qindra qytetarë shqiptarë që udhëtojnë drejt shtetit fqinj po përballen me pritje të gjata në kufi, ndërsa situata ka shkaktuar shqetësim dhe pakënaqësi te udhëtarët.
Sipas informacioneve nga pika kufitare, pala shqiptare po punon me kapacitet të plotë për përpunimin e udhëtarëve, ndërsa në anën greke shërbimi po kryhet me numër të reduktuar sportelesh.
Kjo situatë ka ndikuar në ngadalësimin e lëvizjes dhe në krijimin e radhëve të automjeteve, të cilat shtrihen në territorin shqiptar, në drejtim të pikës së kalimit kufitar.
Udhëtarët shprehen të pakënaqur për kohën e gjatë të pritjes dhe kërkojnë përshpejtimin e procedurave, veçanërisht në një periudhë me fluks të lartë lëvizjesh drejt Greqisë.
Autoritetet shqiptare vijojnë punën me kapacitet të plotë, ndërsa normalizimi i situatës pritet me rritjen e kapaciteteve të përpunimit nga pala greke.
