Dy 16-vjeçarë nga Pogradeci janë arrestuar nga policia, pasi dyshohet se kanë qëlluar me armë zjarri në drejtim të një banese, duke goditur shtëpinë e një 42-vjeçari, i cili rezulton të jetë inspektor pyjesh pranë bashkisë së Pogradecit.
Sipas njoftimit zyrtar të policisë, ngjarja ka ndodhur në muajin maj të këtij viti. Dy të rinjtë dyshohet se pas të shtënave kanë shkuar në varrezat e qytetit, ku kanë hapur një varr të braktisur dhe kanë fshehur aty armën e krimit, një automatik të llojit kallashnikov.
Njëri nga të arrestuarit rezulton të jetë person i njohur për policinë, pasi më herët ka qenë i proceduar për plagosje me thikë ndaj një bashkëmoshatari.
Policia vijon hetimet për të sqaruar plotësisht rrethanat e ngjarjes dhe për të zbuluar nëse 42-vjeçari është qëlluar për shkak të detyrës së tij si inspektor pyjesh.
