Korçë – Drejtoria Vendore e Kufirit dhe Migracionit Korçë njofton se autoritetet e Maqedonisë së Veriut kanë informuar, përmes Qendrës së Shkëmbimit të Informacionit, për zhvillimin e një proteste nga një shoqëri e transportit të mallrave në territorin e Maqedonisë së Veriut.
Si pasojë e kësaj proteste, do të bllokohet lëvizja e mallrave në hyrje dhe dalje në të gjitha pikat kufitare që lidhin Shqipërinë me Maqedoninë e Veriut.
Sipas njoftimit zyrtar:
- Nga ora 00:01 e datës 26.01.2026, do të bllokohet hyrja për në Republikën e Maqedonisë së Veriut;
- Nga ora 12:00 e po kësaj date, do të bllokohet dalja nga Republika e Maqedonisë së Veriut.
Protesta është planifikuar të zgjasë 7 ditë, në rast se nuk do të ketë zgjidhje apo ndërhyrje për kapërcimin e problematikës.
Megjithatë, do të lejohen të kalojnë mjetet e tonazhit të rëndë që transportojnë medikamente mjekësore ose bagëti, si dhe automjetet e udhëtarëve, të cilat nuk do të preken nga bllokimi.
Autoritetet kufitare u bëjnë thirrje qytetarëve dhe subjekteve të transportit të marrin masa dhe të informohen paraprakisht për lëvizjet e tyre.
