Prokuroria e Korçës ka përfunduar hetimet dhe ka dërguar në gjyq shtetasit J.K., K.K. dhe A.G., të akuzuar për ushtrim të paligjshëm të veprimtarive financiare (fajde), pastrim parash dhe largim nga vendi i qëndrimit.
Sipas hetimeve, J.K., i cili ndodhej në masën e sigurisë “arrest në shtëpi”, vijonte aktivitetin kriminal në bashkëpunim me dy shtetaset e tjera, duke dhënë para hua pa licencë dhe duke vendosur si garanci pasuri të luajtshme dhe të paluajtshme.
Nga kontrollet u sekuestruan kontrata noteriale, dokumente, automjete dhe mjete të tjera, ndërsa u provua se të pandehurit kanë përvetësuar pasuri me vlerë shumë herë më të madhe se shumat e dhëna hua, të cilat kapin mbi 200 mijë euro.
Prokuroria konstatoi gjithashtu se të ardhurat kriminale janë futur në qarkullim përmes transaksioneve me pasuri dhe llogari bankare, duke përmbushur elementët e veprës penale të pastrimit të parave. Çështja është dërguar për gjykim.
