Skënderbeu e nis sezonin 2025-2026 në Kategorinë e Parë me mesazh të qartë nga presidenti: Rikthim direkt në Superiore. Korçarët e nisin këtë edicion në shtëpi, ku të shtunë, ora 20:00, presin Burrelin, një kundërshtar që vjet rezultoi një “kockë e fortë” për të gjitha ekipet në Kategorinë e Parë.
Presidenti i Skënderbeut, Ardian Takaj, ka zhvilluar së fundmi një takim me stafin teknik dhe futbollistët e skuadrës, në prag të nisjes së sezonit të ri. Gjatë këtij takimi, kreu i klubit korçar kërkoi angazhim maksimal nga hallkat e klubit, mobilizim të plotë dhe përgjegjësi nga të gjithë, duke theksuar rëndësinë e misionit që e pret skuadrën. Mesazhi i Takajt ka qenë i qartë: Rikthimi në Superiore është objektivi kryesor. Ai shtoi se çdo ndeshje duhet trajtuar si finale dhe kërkoi përkushtim maksimal nga çdo lojtar, pavarësisht rolit që do të ketë në fushën e lojës apo i gatshëm në stol.
Presidenti nuk la pa përmendur as rëndësinë e fanellës që mbajnë futbollistët, duke i kujtuar peshën e historisë së klubit dhe përgjegjësinë që vjen nga mbështetja e madhe e tifozëve korçarë, të cilët vijojnë të qëndrojnë pranë skuadrës edhe në momentet e vështira. Ky takim vjen në një moment vendimtar për klubin, teksa rikthimi në elitën e futbollit shqiptar shihet si një detyrim dhe jo thjesht si synim, duke e bërë këtë sezon një sfidë kyçe për Skënderbeun.
