Pogradec, Shqipëri
Qyteti liqenor i Pogradecit mbrëmjen e kaluar u kthye në skenën e një premiere të madhe kinematografike. Filmi “Dhe vdekja le të presë”, me regji të Edmond Topit, u shfaq për herë të parë para publikut pogradecar, pikërisht aty ku edhe u xhirua.
Salla u mbush me artdashës, qytetarë, aktorë e personalitete, në një pritje masive dhe tepër emocionuese, jo vetëm për peshën artistike të filmit, por edhe për faktin se shumë prej banorëve të zonës ishin pjesë e xhirimeve, duke e bërë këtë premierë edhe më personale për publikun.
Regjisori Edmond Topi, aktorja e mirënjohur Zyliha Miloti dhe Ema Andrea, u shprehën të prekur nga pritja e jashtëzakonshme e publikut. Sipas tyre, filmi mbart mesazhe të forta dhe duhet parë domosdoshmërisht, sidomos nga brezi i ri.
“Kjo nuk është thjesht një premierë, është një rikthim në shtëpi. Pogradeci e mbajti gjallë këtë film që nga dita e parë dhe sonte e ndjemë në çdo duartrokitje.”
“Ky film ka zemër, ka shpirt, ka mesazh… Dhe unë besoj se të rinjtë duhet ta shohin patjetër.”
Një moment prekës i mbrëmjes ishte edhe mungesa e dy ikonave të skenës shqiptare, Tinka Kurti dhe Margarita Xhepa, të cilat ishin pjesë e kastit, por nuk jetojnë më. Mes emocioneve, Topi dhe Miloti u shprehën se ato e ndjekin suksesin “nga lart”.
“Sonte mungojnë dy gra të mëdha… Tinka dhe Margarita, por unë jam i bindur se ato po na shikojnë nga lart, po buzëqeshin dhe po e shijojnë këtë mbrëmje bashkë me ne.”
“Shpirti i tyre është këtu, në çdo skenë, në çdo emocion të këtij filmi.”
“Dhe vdekja le të presë” bashkon një kast të jashtëzakonshëm aktorësh shqiptarë si: Reshat Arbana, Zyliha Miloti, Tinka Kurti, Margarita Xhepa, Luftar Paja, Mehdi Malkaj, Ema Andrea e shumë të tjerë. Filmi është xhiruar i gjithi në Pogradec, duke sjellë peizazhet, traditat dhe shpirtin e qytetit liqenor në ekranin e madh.
Me premierën e mbrëmshme, Pogradeci jo vetëm mirëpriti një film, por përjetoi një ngjarje që do të mbetet gjatë në memorien kulturore të qytetit.
