Elbasan – Shërbimet e Policisë Rrugore të Drejtorisë Vendore të Policisë Elbasan kanë intensifikuar masat dhe ndodhen në gatishmëri të plotë për menaxhimin e qarkullimit rrugor, për shkak të fluksit të shtuar të automjeteve që lëvizin nga Tirana në drejtim të Korçës dhe Vlorës, si dhe në akset e kundërta.
Si pasojë e këtij fluksi të lartë, pritet trafik i rënduar dhe qarkullim i ngadalësuar, veçanërisht në pikat kyçe të akseve kryesore rrugore. Për këtë arsye, Policia Rrugore ka vendosur patrulla shtesë në zonat me ngarkesë të lartë trafiku, me qëllim parandalimin e bllokimeve dhe garantimin e një lëvizjeje sa më të sigurt për përdoruesit e rrugës.
Policia Rrugore këshillon drejtuesit e mjeteve që udhëtojnë në drejtim të Vlorës dhe Gjirokastrës të përdorin, kur është e mundur, rrugë alternative, për të shmangur vonesat dhe ngarkesën e qarkullimit.
Gjithashtu, drejtuesit e mjeteve ftohen të tregojnë durim dhe kujdes, të respektojnë distancën e sigurisë, të qëndrojnë në radhë dhe të shmangin parakalimet e gabuara, të cilat mund të sjellin aksidente ose bllokime të qarkullimit.
Paralelisht, janë forcuar masat parandaluese kundër aksidenteve rrugore përmes monitorimit të akseve rrugore me automjete inteligjente, radarë automatikë dhe patrulla të lëvizshme, me synim rritjen e sigurisë rrugore dhe parandalimin e shkeljeve.
Policia Rrugore apelon ndaj qytetarëve të zbatojnë rregullat e qarkullimit dhe udhëzimet e punonjësve të Policisë, si dhe të denoncojnë çdo shkelje në numrin pa pagesë 112.
