Vetëm 15 kilometra larg Pogradecit, fshati Peshkëpi po përballet me një tkurrje dramatike të popullsisë. Nga rreth 800 banorë që numëronte dikur, sot në këtë fshat në rrëzë të Malit të Thatë jetojnë vetëm rreth 30 banorë, kryesisht të moshuar.
Banorët thonë se shkaku kryesor i braktisjes është mungesa e një rruge të aksesueshme, e cila prej vitesh ka izoluar zonën dhe ka vështirësuar jetesën e përditshme. Emigracioni dhe zhvendosja drejt qyteteve kanë bërë që fshati të humbasë pothuajse të gjithë të rinjtë, ndërsa në shkollën e tij mëson vetëm një nxënës.
Megjithëse zona ka potencial të madh për bujqësi dhe blegtori, mungesa e infrastrukturës, shërbimeve shëndetësore dhe arsimit ka bërë që familjet të largohen gradualisht. Shumë prej ish-banorëve kthehen vetëm gjatë fundjavave për t’u kujdesur për pronat dhe tokat e tyre.
Banorët e mbetur shprehen se ndërtimi i një rruge funksionale është shpresa e vetme për të ndalur shuarjen e Peshkëpisë dhe për të krijuar mundësi që jeta të rikthehet në këtë fshat që dikur ishte ndër më të gjallët e zonës së Pogradecit.
