Fermerët e fushës së Maliqit janë përballur prej vitesh me dëme të shkaktuara nga Diabrotica virgifera, e njohur ndryshe si rrënjëngrënësi i misrit, një ndër dëmtuesit më problematikë për këtë kulturë bujqësore.
Sot, falë përdorimit të teknologjisë moderne, po hidhen hapa konkretë për t’u ardhur në ndihmë fermerëve dhe për t’u ofruar atyre zgjidhje më efikase në terren.
Në kuadër të investimeve të kryera për qendrat tona të transferimit të teknologjisë bujqësore, është siguruar edhe droni bujqësor, i cili është vendosur pranë QTTB Shkodër. Krahas pajisjes me teknologjinë më të re, janë trajnuar dhe certifikuar edhe pilotët për përdorimin profesional të saj.
Droni përdoret jo vetëm për demonstrime praktike, por edhe në rastet kur kërkohet ndërhyrje në terren, duke mundësuar spërkatje më të shpejtë, më të saktë dhe me efikasitet të lartë.
Objektivi kryesor i këtij investimi është që projektet të mos mbeten vetëm në letër, por të shndërrohen në mbështetje konkrete për fermerët.
E gjithë përvoja e fituar, procedurat teknike dhe specifikat e përdorimit të kësaj teknologjie do t’u transferohen fermerëve përmes trajnimeve dhe demonstrimeve praktike, me synimin që ata të familjarizohen dhe ta përvetësojnë gradualisht përdorimin e saj në shërbim të prodhimit bujqësor.
Ky është një shembull i qartë se si investimi në teknologji, i shoqëruar me dije dhe kapacitete profesionale, mund të sjellë zgjidhje reale për problemet që fermerët hasin prej vitesh, duke kontribuar njëkohësisht në modernizimin dhe rritjen e konkurrueshmërisë së bujqësisë shqiptare.
