Në shërbimin e urgjencës së Spitalit Rajonal të Korçës, infermierët mbeten çdo ditë në vijën e parë të përballjes me jetën dhe vdekjen. Klejti Treska, kryeinfermier i urgjencës, prej 16 vitesh i shërben komunitetit korçar me përkushtim, profesionalizëm dhe gatishmëri në çdo situatë emergjente, brenda dhe jashtë ambienteve të spitalit.
Së bashku me stafin infermieror, ai ka përjetuar nga afër sfidat më të mëdha të sistemit shëndetësor, ku pandemia Covid-19 mbetet periudha më e vështirë. Mes frikës, pasigurisë dhe rrezikut të përditshëm, infermierët vijuan misionin e tyre pranë pacientëve, duke mos u tërhequr përballë panikut dhe duke sakrifikuar për jetën e të tjerëve.
Për Klejti Treskën, çdo telefonatë urgjence është një betejë më vete që kërkon reagim të menjëhershëm, qetësi dhe përkushtim maksimal. Ai pranon se momentet më të vështira nuk kanë qenë vetëm rastet kritike, por edhe ato kur puna dhe sakrifica e tyre nuk është vlerësuar siç duhet.
Infermierët e urgjencës në Korçë mbeten simbol i sakrificës së heshtur, njerëz që çdo ditë përballen me sfida ekstreme për të qenë pranë pacientëve në çastet më të vështira, duke dëshmuar se misioni i tyre shkon përtej profesionit.
