Partizani ka hedhur një tjetër hap të rëndësishëm drejt titullit kampion në volejboll për meshkuj, pasi ka fituar edhe ndeshjen e dytë të serisë finale ndaj Skënderbeu.
Pas suksesit 3-1 në kryeqytet, skuadra e drejtuar nga Ylli Tomorri triumfoi edhe në Korçë me rezultatin e ngushtë 2-3, në një përballje plot emocione dhe kthesa.
Të kuqtë dominuan bindshëm dy setet e para, duke i fituar 20-25 dhe 11-25, çka krijoi idenë e një fitoreje të lehtë. Por vendasit reaguan fort, duke marrë setin e tretë 26-24 dhe të katërtin 25-23, për ta çuar ndeshjen në setin vendimtar.
Në momentin kyç, Partizani u tregua më i saktë dhe më i qetë, duke fituar setin final 10-15 dhe duke siguruar fitoren e dytë në seri.
Me këtë rezultat, Partizani afrohet ndjeshëm me titullin kampion, megjithatë trajneri Tomorri thekson se asgjë nuk ka përfunduar ende dhe kërkon përqendrim maksimal për ndeshjen e radhës.
Nga ana tjetër, kapiteni i Skënderbeut, Joan Sotir, pranon vështirësinë e situatës pas dy humbjeve, por shpreh besimin se skuadra mund të rikthehet dhe të përmbysë serinë.
Ndeshja e tretë do të zhvillohet të mërkurën në kryeqytet. Një tjetër fitore e Partizanit do t’i japë menjëherë titullin kampion, ndërsa një sukses i Skënderbeut do ta zgjasë serinë në ndeshjen e katërt, që do të luhet sërish në Korçë.
