60 të dënuar në Institucionin e Ekzekutimit të Vendimeve Penale në Drenovë të Korçës janë liruar këtë të martë, pasi përfituan nga ligji për amnistinë penale.
Jashtë ambienteve të burgut, familjarë të shumtë prisnin me emocion të afërmit e tyre. Përqafime, lot gëzimi dhe takime pas një kohe të gjatë shoqëruan daljen e të liruarve, për shumë prej të cilëve kjo ditë shënon fillimin e një etape të re në jetë.
Mes tyre ishte edhe Igli Cëngëtari nga Devolli, i cili tregoi se kishte vuajtur mbi katër vite burg dhe përfitoi ulje dënimi prej një viti falë amnistisë.
Të liruarit e tjerë rrëfyen se synojnë të nisin gjithçka nga e para, të gjejnë punë dhe të rindërtojnë jetën pranë familjeve të tyre. Disa prej tyre, megjithatë, shprehën pakënaqësi ndaj sistemit të drejtësisë, duke pretenduar se janë dënuar padrejtësisht dhe duke ngritur akuza për shkelje të të drejtave të tyre gjatë vuajtjes së dënimit.
Njëri prej tyre deklaroi se nuk ishte lejuar të takonte familjarët dhe fëmijët për rreth dy vite, ndërsa pretendoi se ishte kërcënuar me jetë dhe se do të ndjekë rrugët ligjore për të kërkuar drejtësi.
Për 60 të liruarit nga burgu i Drenovës, kjo ditë shënon fundin e vuajtjes së dënimit dhe fillimin e një kapitulli të ri. Sfida e tyre tashmë mbetet integrimi në shoqëri, rikthimi pranë familjeve dhe ndërtimi i një jete larg problemeve me ligjin.
