Prej fillimit të muajit gusht, Inspektorati Kombëtar i Territorit, në bashkëpunim me Policinë e Shtetit, do të nisë aksionin për pastrimin e akseve kombëtare në të gjithë vendin. Ky njoftim është bërë nga zëvendëskryeministrja Belinda Balluku, e cila theksoi se ndërhyrja ka si qëllim lirimin e hapësirave publike nga ndërtimet pa leje apo jashtë kritereve ligjore.
Në qarkun e Korçës, pa nisur ende zyrtarisht aksioni, dhjetëra biznese që ndodhen përgjatë rrugës nacionale Korçë–Pogradec kanë nisur vetë t’i prishin rrethimet e tyre, duke liruar hapësirat pranë karrexhatës. Sipas udhëzimeve të IKMT, asnjë ndërtim nuk duhet të jetë më afër se 6 metra nga rruga kryesore.
Një prej pronarëve të prekur është Krenar Koçibelli, i cili administron një servis buzë rrugës. Ai shprehet se është i detyruar të veprojë, pavarësisht se investimi i tij është bërë me leje që në vitin 2000.
“Vijnë dhe më thonë ta prish rreshtimin që kam me leje. Për dy-tre ditë nuk mund ta largosh dot. E prisha vetë rrethimin, por nuk merret asgjë parasysh. Nëse shteti po merr tokën, përse nuk bën shpronësim? Kjo nuk është mënyrë. Harxhime pafund, kush i mbulon? Nëse është për rrugën, e jap tokën, por kjo është shkatërrim total. Kur e ndërtova ndërtesën, rruga ishte ndryshe, më morën tokë atëherë, po tani çfarë ndodh? Të mbyll dhe të iki, si shumë të tjerë.”
Vetëm në aksin kombëtar Qafë Thanë–Kapshticë, numërohen rreth 650 biznese të vendosura buzë rrugës. Një pjesë e tyre kanë nisur vetë shembjet, ndërsa të tjerë kërkojnë dëmshpërblim për investimet që po humbasin.
