Ermista Grabocka-Custer lindi dhe kaloi vitet e para të fëmijërisë në Korçë, përpara se të zhvendosej në Shtetet e Bashkuara, ku u rrit dhe u arsimua. Me kalimin e viteve, ajo ndërtoi një karrierë të suksesshme, që e çoi deri te një prej kompanive më të mëdha në botë, PepsiCo.
Por rrugëtimi i saj profesional nuk nisi në marketing.
Ermista ishte e shkolluar për Kimi dhe fillimisht punonte si kimiste ushqimore, duke u marrë me zhvillimin e produkteve. Pikërisht kjo eksperiencë bëri që ajo të interesohej gjithnjë e më shumë për mënyrën se si konsumatorët lidhen me produktet dhe markat.
Kjo e shtyu të ndërmerrte një ndryshim të rëndësishëm në karrierë, duke ndjekur një master në Marketing dhe Strategji.
Pas këtij transformimi profesional, Ermista u përfshi në projekte të rëndësishme marketingu dhe një prej eksperiencave më të mëdha ishte pjesëmarrja në planifikimin dhe realizimin e fushatave të PepsiCo për Super Bowl, një nga eventet më të mëdha sportive dhe mediatike në Shtetet e Bashkuara.
Pepsi ka pasur ndër vite një lidhje të fortë me spektaklin e Super Bowl, duke bashkëpunuar me yje të muzikës si Lady Gaga, Beyoncé dhe Jennifer Lopez.
Por pas reklamave spektakolare që shihen për pak sekonda në ekran, fshihet një punë e jashtëzakonshme organizative.
Sipas Ermista Grabocka-Custer, një program marketingu i këtij niveli mund të kërkojë 6 deri në 8 muaj përgatitje, si dhe angazhimin e qindra njerëzve.
Në këtë proces përfshihen ekipe të shumta, nga agjencitë kreative deri te ekipet ligjore, me një koordinim të detajuar përpara se fushata të shfaqet përfundimisht në ekran. Historia e Ermista Grabocka-Custer është një shembull i një karriere që nisi në laborator, kaloi në marketing dhe përfundoi në një prej skenave më të mëdha të industrisë globale të reklamës.
