Një foto e rrallë historike është publikuar së fundmi nga studiuesi Ledjan Zeqollari, duke hedhur dritë mbi një fragment të panjohur të historisë së zonës së Mokrës.
Bëhet fjalë për një spital fushor ushtarak të ndërtuar nga Kryqi i Kuq Italian gjatë Luftës Italo-Greke, konkretisht në vitin 1941. Spitali ndodhej në luginën e Shkumbinit, në afërsi të fshatit Somotinë, me Proptishtin në sfond, dhe shërbente për trajtimin e ushtarëve të plagosur në vijën e luftimeve, kryesisht në segmentin Kalivaç – Guri i Topit, disa dhjetëra kilometra më në jug.
Ndërtuar në një pozicion strategjik për kohën, spitali përfaqësonte një nga pikat më të rëndësishme të ndihmës mjekësore për trupat italiane në zonën e Mokrës, gjatë përplasjes me forcat greke në juglindje të Shqipërisë.
Ky zbulim arkivor vjen si një dëshmi domethënëse e rolit që ka pasur Mokra në zhvillimet ushtarake të periudhës së Luftës së Dytë Botërore, një zonë që ende fsheh në rrënjët e saj shumë histori që presin të dokumentohen dhe të dalin në dritë.
